សៀមរាប៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានបញ្ជូននូវសារជំរុញដល់ពលរដ្ឋការពារនៅសន្តិភាពបន្ទាប់ពីរំលឹករឿងដ៏ជូរចត់មួយ។
សម្ដេចតេជោបានសរសេរនៅលើតេឡេក្រាមរបស់សម្ដេចនៅព្រឹកថ្ងៃទី១៦ ខែមេសា ថា ថ្ងៃនេះកាលពី ៤៨ឆ្នាំមុន សម្ដេចត្រូវបាត់បង់ភ្នែកម្ខាង។ សម្ដេចបានលើកឡើងថានេះហើយគឺជាស្នាដៃនេះសង្គ្រាមដែលបានបំផ្លាញគ្រប់យ៉ាងរាប់ទាំងជីវិតរបស់មនុស្ស។
សម្ដេចនាយកបានលើកឡើងថាជាសំណាងល្អដែលសម្ដេចមានជីវិតនិងចូលរួមកសាងសន្តិភាពនិងរក្សាសន្តិភាពដល់កម្ពុជា ៤៨ឆ្នាំមកនេះ។
សម្ដេចថា៖ «សំណាងល្អខ្ញុំនៅមានជិវិតនិងបានចូលរួមកសាងសន្តិភាពនិងរក្សាសន្តិភាពដែល ៤៨ឆ្នាំក្រោយប្រជាជន បានសប្បាយរីករាយក្រោមម្លប់នៃសន្តិភាពនេះ។ រក្សាសន្តិភាពបានគឺរក្សាបានគ្រប់យ៉ាងរាប់ទាំងជិវិតមនុស្សដែលយើងត្រូវរួមគ្នារក្សាសន្តិភាពនេះឲ្យខាងតែបាន»។
ថ្លែងក្នុងពិធីបើកអង្គរសង្ក្រាន្តព្រឹកថ្ងៃទី១៤ ខែមេសា ឆ្នាំ២០២៣ នៅប្រាសាទបាយ័ន ខេត្តសៀមរាប សម្ដេចតេជោ ហ៊ុន សែន បានលើកឡើងថា ដោយសារកត្តាសន្ដិភាពបាននាំមកឱ្យកម្ពុជាអាចប្រារព្ធពិធីចូលឆ្នាំខ្មែរបានដោយរីករាយ និងរលូន ដែលខុសពីសម័យសង្គ្រាម។
សម្ដេចថា៖ «កាលពី ៤៨ឆ្នាំមុនគ្រាប់កាំភ្លើងធំបានបាញ់ចូលគ្រប់ទីក្រុង»។
គួរឱ្យដឹងផងដែរ សាធារណរដ្ឋខ្មែរបានដួលរលំនៅថ្ងៃទី១៧ ខែមេសា ឆ្នាំ១៩៧៥ ស្របពេលដែលកម្ពុជាបានរៀបចំពិធីចូលឆ្នាំប្រពៃណីជាតិខ្មែរ។
ការដួលរលំនៃសាធារណរដ្ឋខ្មែរបានធ្វើឱ្យកម្ពុជាឈានជើងចូលដល់របបខ្មៅងងឺត និងសង្គ្រាមរហូតដល់ឆ្នាំ១៩៩៨ ទើបអាចរកសន្ដិភាពបានឡើងវិញតាមរយៈនយោបាយឈ្នះ-ឈ្នះ របស់នាយករដ្ឋមន្ត្រី សម្ដេចតេជោ ហ៊ុន សែន៕
